قراءة لرواية الوجوه البيضاء

عارفين ليه سألتكم قريب بتحبوا تقرأوا لمين من المؤلفين الأجانب؟
عشان قصتي مع ترجمة روايات أرثر ماكن وويليام هوب هودسن..
المقربين ليا وأصدقائي عارفين إني بقضي معظم وقتي في القراءة أكتر من أي شيء، فيه ناس كمان تعرف إن بدأت أقرأ ملف المستقبل من صغير جدا تقريبا 5 سنوات، ولهذا بقدر جدا الكاتب الي يقدر يدخلني في عوالمه التخيلية ويقنعني بها، وفي نفس الوقت يقدر يقنعني إن ما يحدث في خياله هو صورة صادقة لما يحدث في حقيقتنا، وأظن ده هدف مهم للقراءة أصلا؛ لأن حياة واحدة لا تكفينا وبالتالي محتاجين نعرف اكتر عن طريق فهم خبرات من سبقونا.
ايه علاقة ده بترجمتي للروايات؟
مش هتكلم هنا عن الظل خارج الزمان لأن ناس كتير عارفة قصة ترجمتها واختياري لها وكذلك لأن أراء من قرأوها جيدة، لكن هتكلم عن الوجوه البيضاء أو the white people للأيرلندي أرثر ماكن.
لما قرأت الرواية أول مرة مفهمتش بالضبط الكاتب عايز يقول ايه، القصة انتهت بسرعة وهي أصلا صغيرة، بس في نفس الوقت لقيت نفسي مشدود لها لسبب مجهول، قعدت أقرأ تفسيرات للنهاية وريفيوهات الجود ريدز وبالفعل عملت مقال بسيط عن الكاتب والرواية في نهاية العمل، لكن برده حسيت إن فيه حاجة ناقصة.
العمل نزل السوق واشتغل كويس لأن دار دارك ممتازة في توزيع وتسويق الأعمال وكذلك غلاف العمل يشد، سيدة عنيها مخيفة ومنظرها يشي بشر غير مألوف، وده حقيقي وظاهر في الرواية، معظم الي اشتروا الرواية وكتبوا تعليقاتهم اتكلموا عن حاجات كتير فاجئتني، بالفعل محدش فهم ابي أنا فهمته منه، كان فيه كلام جوه العمل أنا حاسه كويس بس حسيته بديهي جدااااا مش محتاج يتقال أصلا، الناس ركزت على الحوار الأولي عن طبيعة الخير والشر، وعلى الخرافات الي علمتها الخادمة للطفلة، لدرجة إن فيه قارئ كريم قال على تطبيق أبجد ما معناه: إن الرواية مناسبية جدا لمحبي الخرافات والأساطير! الي هو أهلا وسهلا، على أخر الزمن هروج للخرافات!
أنا بقى هقولكم ما فهمته من العمل، الموضوع البسيط البديهي والي مش عارف ليه الناس مفهمتهوش رغم بساطته..
الرواية بيظهر فيها أب للبنت، ايه دوره؟ ده سؤالي لكل واحد قرأ الرواية، الرجل ظهر في مشاهد معدودة، لأنه ورغم وفاة أم البنت كان مشغول بأعماله، ولهذا جاب لها مربية ترعاها وتعلمها، طبعا هي علمتها ثقافة وثنية مخيفة وسحرية، وحتى لما ظهر الأب كان عشان البنت تحكيله بتلقائية عن القصص الي قالتها لها المربية، فما كان منه إلا إنه طرد المربية وقال للبنت إنها مجرد خرافات، طبعا البنت عارفة إنها مش خرافات بدليل إنها عملت كل الي علمته لها المربية لحد ما ماتت.
طيب هنا مين المذنب؟ مين الي عمل الشر؟