كوابيس نهاية العالم

حلمت قبل كده بنهاية العالم؟
شفت الدنيا في كوابيسك بتتدمر؟
أنت مش لوحدك.

رؤية أحداث مُستقبلية تؤدي لنهاية الأرض أو سكانها بالشكل اللي احنا نعرفه في المنام أمر شائع الحدوث، بس احنا بنخاف نتكلم، بنخاف يتحقق!
الحقيقة.. كوابيس نهاية العالم لها أهمية ورمزية عالية جدا، نفسيًا في المقام الأول.
العديد من الأطباء النفسيين بيحللوا كوابيس نهاية العالم، وبيربطوها بمشاعر الإنسان وتفكيره وقت حلمه بيها، حاجات زي الأفعال اللي بنعملها في الحلم، شعورنا نفسه ناحية النهاية، سعداء ولا تعساء.
بيقولوا انك إذا حلمت بالنهاية بتحصل في الحلم، فده معناه أنك في مرحلة نفسية وسيطة، انتقالية من حالة لحالة تانية، لو بتحلم بما بعد النهاية، بتشوف توابع الكارثة اللي حصلت أيًا كان نوعها، فالحلم هنا بيرمز لانطباع حصل عندك بسبب موقف سيء شوفته وأنت صاحي، في عالم اليقظة.
قرأت في الموضوع بتوسع زي ما قلت، في أراء كتير عن كل نوع من الكوارث المعروفة اللي ممكن تؤدي لنهاية العالم وممكن نشوفها في أحلامنا، جمعت لكم الأراء دي ولخصتها بطريقتي.

إذا شفت عالم غرقان بالزومبي، فده انعكاس لشعورك بانعدام الأمل في عالمك الحقيقي، وكأن كل بشري بتشوفه خلاص.. مبقاش إنسان! كلهم ميتين، كلهم بيحاولوا يأكلوا بعض.

إذا شفت العالم بيحترق، نار عظيمة، بركان وحمم، وتحس أنها بتاكل كل حاجة، بس ده معناه برده أن النار هتنخمد قريب، مش هتولع للأبد، وأن الغضب والدمار إلى زوال، كل شيء في عالم اليقظة يُمكن إعادة بناءه.

أما إذا حلمت بتسونامي، أو طوفان عظيم أغرق الأرض، فده إشارة لحزن عميق في الحقيقة، حزن غطى الأرض كلها، من الصعب إنك تلاقي حد وقتها لسه عايش، وبتحس لأن قوة الفيضان زي ما قلنا بتغطي كل حاجة، وده غالبا بيحصل لما تفقد إنسان بتحبه أو عزيز عليك، أو لما تحس إنك في طريقك لخسارته.. للأبد.

في الغرب، ينتشر عندهم الشكوى برؤية كوابيس عن عصر جليدي، الثلج غطى العالم، وكل شيء اتجمد وثبت مكانه، ده إشارة لكونك لا تهتم باللي حواليك، مشاعرك ناحيتهم بقت باردة، الإنسان اللي بيهتم جواك.. مات، الحلم نفسه ممكن يكون فيه اشتياقك ناحية ذرة حرارة، نفسك ترجع تهتم بالناس ويهتموا بيك.

ممكن يحصل غزو فضائي في المنام، وده بيرمز غالبًا لإحساسك بوجود قوة غريبة تجتاحك، بتسرق منك عالمك وتطلعاتك وذكرياتك، بتحاول تستبعدك من حياتك، وتغيرها من الجذور.
بيقولوا أن ساعات بيكون الحلم ده رمز عن وجود رئيس جديد في شغلك أو في بلدك، وإن ممارسته لسلطاته بتكون مش على هواك، زي الغزو الفضائي، أو الغزو الحربي عامة.
ممكن تشوف وكأن أعداد ضخمة من الناس بتموت، أو بتختفي أو حد بيخطفهم، ودي رمزية للي يحصل لو قاومت القوة الغريبة اللي جاية تسيطر على حياتك.

.فيه ناس بتحلم بتحكم الآليين في العالم، أو الكومبيوتر، هنا أنت خايف من تطورات العلم والتكنولوجيا، فيه ناس بتحلم بسيطرة الشياطين والكائنات المفزعة، فيه ناس بتحلم بتحكم فصيل بشري ما في العالم، ديني أو سياسي أو فوضوي، في كل الأحوال أنت هنا بتحلم بفكرة السيطرة على عقلك وجسمك، ديكتاتورية شمولية، لا سبيل للمقاومة، لازم تسلم إرادتك لهم، تطيع الأوامر دون تفكير، تأذي نفسك ولا تعترض، لازم تمشي وسط القطيع، أنت هنا في الحقيقة بتشتكي من كونك لم تعد نفسك!

كوابيس الدمار بأسلحة الدمار الشامل أو القنابل النووية مشهورة، أنت هنا بتحارب معركة هتنهي كل حاجة، هتتقطع كل الروابط والاتصالات، ووجودك في محيط الحادث معناه موتك، وبطريقة شنيعة مؤلمة.

ممكن برده تحلم بتحكم الشياطين بطريقة تانية، بأنهم مثلا يتلبسوا كل الناس اللي حواليك، أو إن الناس يتحولوا بطريقة ما لمسوخ، بسبب نووي أَو جيني مثلا، وهنا برده أنت بتشتكي من تغير الناس حواليك للأسوأ، وأنك مينفعش تكون وسطهم، الناس الجديدة مش عايزينك أنت تبقى أنت، يا تبقى زيهم يا تروح وما ترجعش، الكلام ده ينطبق على أحلام الزومبي برده.

مش بضحك عليكم لما أقول إني شفت كل الكوابيس دي، من وأنا صغير كمان، مش دلوقتي بس، ما عدا يمكن العصر الجليدي، أو إن نيزك يضرب الأرض، لكن الأكثر شيوعا بالنسبة لي حاجتين:
الأول هو القيامة بمفهمومها الإسلامي، وإنك خلاص.. لا لحقت تتوب ولا تصلي حق الصلاة، وهتقابل ربنا في وقت قريب، ده راجع لخوفك الحقيقي من تقصيرك، قلبيًا وجسديًا، دي إشارة ربانية أو من عقلك الباطن، ألحق نفسك.

الثاني هو إن أي كيان خيالي من الي بيهددوا في العالم في الروايات والأفلام ينجح في ده، أنا فاكر حلم وحش الدخان في مسلسل lost بعدما انتقم من كل البشر على حبسته في الجزيرة، كان بيحكي لي ويعيط، كأنه ندمان، أو زعلان لأن غضبه لسه لم ينتهي، تفسير الحلم ده بالنسبة لي هو رغبتي وقتها في تغيير المجتمع في لمح البصر، عشان تبقى نظرته هي نظرتي! لكن ده للأسف هيؤدي لدمار كبير، في حياتي ونفسيتي، ده سبب الاحساس بالقهر.

أتمنى إذا المقال عجبك إنك تشيره، يمكن تفيد غيرك زي ما أنا نفسي استفدت قبل ما أحاول أفيدكم.