ملاحظة1:
ده تعريب لاتنين من مقالات الكاتب Jeff goins ومن ضمن كورس مجاني كتبه لتحفيز الكُتاب الشباب على إنهاء كتابة أعمالهم المتوقفة، الكورس بترجمه حاليًا في جروب مغلق هحط الرابط بتاعه في أخر المقال.
ملاحظة2: موضوع خلق عادة الكتابة كل يوم هيكون له كورس لوحده بعد الانتهاء من الكورس الحالي، هنا هنتكلم بصورة سريعة.
محدش فينا أتولد والقلم في ايديه! محدش كتب قصص قبل ما يتعلم المشي أو حفظ الحروف، الكتابة اليومية عادة مُكتسبة زي أي عادة اتعلمت تعملها، بس طبعا بمرور الوقت وبإجبار النفس على الجلوس أدام ورقة بيضاء وملئها بهراءنا، الموضوع بيبقى أسهل بكتير مما هو عليه الآن، واحنا بنكتب لمجرد الهواية.
وكل العادات بتمشي بنفس الطريقة؛ في الأول صعبة وتقيلة، ومع كل تجربة جديدة بتبقى أسهل، بتبقى طبيعية وذاكرتك العضلية والعقلية بتعتاد عليها، وهتتفاجئ إنه بيحصل بدون مجهود في يوم من الأيام.
نيجي بقى لسؤال صادم، ليه نكتب كل يوم أصلا؟ هل العالم محتاج مزيد من الكلمات والمقالات؟ الحقيقة حتى لو العالم مش محتاج كلماتك دلوقتي، كلماتك ممكن تأثر ولو في شخص واحد، الكتابة اليومية مش بس هتخليك كاتب أفضل، لا هتخليك إنسان أفضل كمان.
إزاي؟
- بتعلم الانضباط: دي حاجة أنا بعاني منها لإني متعلمتش أي رياضة في شبابي ولا دخلت الجيش، وأظن ده سبب معاناتي مع الانضباط لحد وقت قريب، لأني معيشتش الانضباط المطلوب في صغري، الكتابة اليومية لدقائق قليلة شبه الجري أو القراءة أو الصلاة يوميًا أو صيام فترات صغيرة من نهار رمضان في صغرك، عشان تتعود لما تكبر.
- هتخليك أذكى: الكتابة بتجبر على التفكير، وخاصة الكتابة باليد، ده هيزود نشاطك الإدراكي، مرن عضلات مخط على الانطلاق في الكتابة، وأجعل خلايه يتواصلوا مع بعض، بسهولة هتعرف إن ده هيخليك أكثر ذكاء.
- هتحسسك بالإنجاز: وأظن إننا محتاجين نعرف إن وقتنا مش بيضيع على الفاضي، وده بيحققه الكتابة اليومية حتى لو سطور قليلة، الإنجازات الصغيرة دي هتديك تشبع ورضا ودفعات للأمام.
طبعا في أسباب تانية زي إنها وسيلة التربح الأساسية لنا كتير من الكُتاب المحترفين، بس هما كمان تعلموا يكتبوا كل يوم من قبل ما يوصلوا للمراحل المتقدمة دي، يعني: هما مش بيكتبوا كل يوم عشان يكسبوا، لا هما بيكسبوا عشان بيكتبوا كل يوم.
وده اسمه (قوة العادات) لتشارلز دويج، يا ريت تقرأوا الكتاب ده أو تسمعوا ملخصه على يوتيوب، ده من قناة أخضر
ومن قناة علي وكتاب
وده الكتاب صوتي كامل بالعربية
جيف جوينز عشان يتابع مع طلابه عمل مجموعة خاصة بتكتب فيها -لما تقرر تكتب كل يوم- 500 كلمة بالانجليزية لمدة 30 يوم، وهو كمان بيديك نبذة عن الي ممكن تكتب عنه، الناس الي نجحت في التحدي قدروا بعد شهر ينشروا كتب على أمازون ممكن يكسبهم فلوس، عن نفسي حاولت في موضوع الكتابة بالانجليزية بس وصلت بس ل100 كلمة يوميا وكملت اسبوع بس تقريبا، المهم تجرب وتحاول وتدوس.
طيب يلا بينا ناخد ملخص مقدمة الكورس القادم، 3 خطوات نحو عادة الكتابة اليومية
ايه الي بيفرق بين كاتب مُحترف وكاتب هاوي؟
هل الموضوع هبات ربانية بس
الإجابة: الالتزام بالكتابة هي الفرق الأساسي.
طيب هل الكتابة التزام أصلًا؟ ولا مجرد عادة؟
تعريف الالتزام هو: تمرين الناس على إطاعة قواعد معينة باستخدام سياسة الثواب والعقاب.
طبعا ده كلام صعب، بس مين بيعمله؟ مين بيعاقب نفسه لما ميحققش المطلوب منه سواء يوميا أو في خلال مدة معينة بالنسبة للمهام الكتابية؟ وهل في ناس بتعاقب نفسها للسبب ده؟
الفكرة إن العادة تعتبر نقيض للكلام ده، العادة هي ممارسة فعل معين بانتظام واستقرار، خاصة لو حاجة صعب تتخلى عنها.
تخيل معايا دلوقتي إن الكتابة دخلت بتناغم في العادات اليومية الي بتمارسها، وبقى صعب تتخلى عنها، ومبقاش فعل بتجبر نفسك عليه خوفًا من العقاب، لا بقى شيء بتحبه وتستمتع به.
الفكرة هنا هي أن الموضوع يرجع لاختيارك، ممكن تعامل الكتابة كالتزام أو كعادة، ممكن تكتب لإنك بتحب الكتابة، وبالتالي هتعملها كل يوم ، وطبعا ده محتاج وقت عشان توصله، لكن مبدئيا أنا عايزك تستمر ل21 كحد أدنى أو 66 يوم كحد أدنى، بس مش لازم أرقام محددة يعني عشان لا تشعر بالاحباط أو الإجبار لأي سبب.
لازم تعرف المراحل ال4 لتكوين العادة:
- مرحلة الحماسة للممارسة
- مرحلة مقاومة النفس
- مرحلة عدم الراحة
- مرحلة الممارسة التلقائية
ودي نقاط هتفهمها من كتاب قوة العادات، وخاصة إن عادة الكتابة بتستنزف طاقات كتير من جواك.
نقول تاني: الفرق بين المحترف والهاوي هو الممارسة، والمداومة؛ الهاوي بيستسلم، المحترف لا يستسلم.
يلا بينا نتكلم عن الخطوات ال3 لممارسة عادة الكتابة اليومية
- تهيئة بيئة مناسبة: وتكون هادية وبعيدة عن المشتتات.
- تحديد وقت: ومش لازم وقت طويل المهم تخصصه للكتابة فحسب، ويا ريت يكون نفس الوقت كل يوم بس طبعا ده مش شيء ضروري، لكنه مهم لو بيجيلك الإحباط سريعا
- حدد هدف: سواء 100 كلمة أو ألف كلمة، ودلع نفسك لما تنجح، همنجواي كان بيكتب يوم 1500 كلمة في يوم و300 كلمة ونص ساعة راحة في اليوم الي بعده.
كرر الخطوات دي باستمرار، وخلال شهر هتلاقي نتيجة ممتازة، ما بالك بشهور من الاستمرار؟
طيب، أفرض شيطان خوفك طلع بسؤال صعب: أعمل ايه لو مش عارف اكتب عن ايه؟
سؤال عظيم وإجابته سهلة؛ مش مهم تعرف، اكتب وبس، مهما كانت الفكرة تعبانة وأسلوبها سيء، دي أمور تتظبط بعدين، بعد ما النص يجهز ويكون موجود فعلا.
بس فيه شوية أفكار ممكن نستعين بها:
- اكتب عن الحاجات الي حواليك
- اكتب عن يومك
- اكتب مقطع من منتصف كتابك القادم
- اكتب خطاب لأولادك أو لأصدقاءك
- اكتب ملخص لكتاب أو مراجعة لفيلم
- اكتب أي حاجة
المهم في أخر اليوم أسأل نفسك: هل كتبت اليوم؟ وتجاوب بايوه، أنا كتبت، مهما تغير وقت كتابتك أو مدة الجلسة نفسها أو قل عدد كلماتك، كده أنت نجحت خلاص، وبكره تعمل نفس الكلام.
بالتوفيق بإذن الله.
كتابات د. أحمد تركي 