10 كليشيهات في كتابة الفانتازيا، وازاي تتغلب عليهم.
مقال لجابرييل رودي، نُشر في فبراير 2015 على مدونة writeforthe king، مترجم بتصرف طبعا
***
إذا دخلت أي مكتبة أو معرض كتاب، هتلاقي رفوف كتير من كُتب وروايات الفانتازيا، العجيب بقى ورغم ان الفانتزي معناه اختلاق عوالم كاملة بكل عناصرها من الخيال وحده ودون التزام بأي قواعد علمية كانت، إلا إن فيه كليشيهات أو عناصر متكررة وسهل تتوقعها موجودة في كتير منهم.
في المقال ده أنا مش بنصحك تغير كتابتك بعيد عن النقاط دي كملها، لإن من غيرهم في المجموع مش هيكون عندنا رواية فانتازيا، بتحصل في أرض غير أرضنا، كل الفكرة إنك تحاول تلوي عنق المعلومات وتغيرها بطريقة مبتكرة تناسبك، ومع كل كليشيه منهم هقولك على طريقتين مقترحتين للتغيير.
١. نبوءة المختار
كتير من الروايات بتتكلم عن النبوءات، ظهور أبطال هينقذوا العالم زي أراجورن في أمير الخواتم وهاري بوتر.
ازاي نقدر نغير النبوءة دي؟
– ممكن نخلي النبوءة ببتكلم عن طهور الشرير، زي الوايت ووكرز في لعبة العروش.
– ممكن نخلي حد غني أو مُثقف يحاول يطبق النبوءة على نفسه بالعافية.
٢. عالم العصور الوسطى الأوروبي
قليل لما تلاقي عوالم فانتازيا مش شبيهة بالعصور الوسطى المُظلمة في أوروبا، فإذا قدرت تلغي وجود السحر والكائنات الغريبة هتلاقي نفسك وسط ملابس العصور الوسطى ونظامهم الاجتماعي من فرسان ولوردات وملوك وخدم، وكذلك القلاع والأسلحة وكل حاجة لها علاقة بالزمن ده.
ازاي ممكن نغير ده؟
– اعمل عالم فانتازي في صحراء، أو في وجود عرب وبدو، أو قبائل الأمازون؟ شوف لعبة العروش وهي بتظهر الدوثراكي ودورن مثلا.
٣. الأسماء دائما غربية، أو من أصل كلتي أو نوردي
شوف الأسماء: هاري، جاندالف، إيراجون، كاسبيان، جون سنو. كلها أسماء من الثقتفة الغربية، وصعب تلاقي حاجة مختلفة.
ازاي تغير ده؟
– شوف أسماء من أصل أسباني، أو عربي، أو من الهنود الحمر، أو الأسيويين، شوف أسماء لاعبي الكرة.
– ممكن نعمل حاجة أصعب، ماذا لو خلينا أسماء عربية تظهر في قبيلة هنود حمر وسط عالم فانتازي؟
٤. البطل لازم يحمل سيف
قليل لما تلاقي رامي سهام هو البطل، في لعبة Dungeon Seige بيكون الترتيب هو السيف أو السلاح اليدوي قريب المسافة ثم السهم ثم السحر، شوف كده أراجورن وكونان البربري وجون سنو وجايمي لانستر، اسليف هو أقدم سلاح وهو العلامة الأساسية على البطولة.
نغير ده ازاي؟
– نشوف بطل يكون رامي سهام.
– نخليه ماهر في حمل الفأس مثلًا، أو الفنون القتالية باستخدام العصي، ونرجع السيف لبطل أقل في الأهمية.
٥. الأسلحة المعروفة هي السيوف والأقواس والفؤوس.
فيه أسلحة كتير تانية على فكرة، وأكيد بطلك مش مجرد جندي وخلاص يعني.
الحل:
– نشوف الأسلحة الأخرى، الرماح مثلا، أو الخناجر، أو الصولجانات.
– اخترع سلاح بنفسك، المهم يكون بيقتل الناس.
٦. الحكومات لازم تكون ملكية مطلقة
والسبب واضح، معظم الفانتازيات بترجع لعصور أوروبا المُظلمة، والي كانت عبارة عن ملكيات وإقطاعيات.
نغير ده ازاي؟
– ممكن نعمل جمهورية، أو ديمقراطية؟ بما انها فانتازيا مش عالمنا الحقيقي فممكن طبعا، ممكن تعمل نظام شمولي، أو ثيوقراطية دينية.
– ممكن تعمل عدة أنواع من الحكومات في نفس العالم، أقرأ شوية في تاريخ العالم وأنواع الحكومات عشان تستلهم الأنظمة في روايتك الجديدة.
٧. الشخصيات الخيالية هي: البشر المتحورين، والأقزام، والجن والتنانين
وبنشوف كُتب كاملة لا تحتوي إلا على هذه المخلوقات، في حين إنك ممكن تستخدم:
– مثلا السايكلوب، والقنطور، والمستذئبين ومصاصي الدماء، أو الغجر على سبيل المثال برده.
– ممكن تبحث بنفسك في الثقافات العربية عن المخلوقات الغريبة والأٍطورية، كتاب القزويني مثلا، أو كتاب بورخس عن الكائنات الغريبة.
٧. لا وجود العلوم
معظم العوالم الفانتازية بتصور العالم وقت العصور المظلمة، في جهل تام وتكنولوجيا صفرية، وفيه كُتاب بيستخدموا السحر مكان التكنولوجيا.
نغير ده ازاي؟
– ممكن ندمج العلماء مع السحرة، زي في رواية رحلة السماور أو أضواء الشمال.
– مكن نخليهم يتحاربوا، أو ممكن نفسر السحر علميًا؟
٩. تكنولوجيا العصور الوسطى
هنا بنستبعد نوع الفانتازيا المُسمى بالفانتازيا الحضرية زي رواية ظل بابيلون أو ألعاب الجوع، وهتلاقي أن كل الفانتزي المتبقي أقل تكنولوجيا من عالمنا، احنا عندنا انترنت وعربيات وطائرات، يا ترى تكنولوجيا عالمك هتقدم ايه؟
– فكر في المشاكل الي بيواجهها عالمك، وايه ممكن يكون الحل الي ممكن يقدمه عالم عايش هناك لهم.
– تاني، فكر ازاي ممكن العلم والسحر والتكنولوجيا يتفقوا مع بعض لخدمة العالم، متنساش إن البشر في يوم من الأيام قالوا عن الطيران والبلورة السحرية مجدر خيالات.
١٠. لازم تكون فيه رحلة
الرحلة غالبا هي الي بتخلي للرواية طعم وهدف، لكن هل ده لازم في كل رواية؟ هل لازم تحصل معركة و رحلة بطولية في كل مرة؟ ويكون العالم في خط برده في كل مرة؟
– مش لازم الفانتازيا تكون عن حرب بين دولتين، وان واحدة منهم تنتصر على التانية، هل ممكن البطل يعمل على توحيد الدول دي أو إرساء السلام بينهم، او يعملوا ثورة لإنشاء دولة فانتازية ثالثة؟
– أو ممكن بعد ما البطل يهزم الشرير ويحقق الهدف ويسترد السيف المفقود، يكتشف إن المشكلة الحقيقية هي الوصول بقومه لبر الأمان؟
وفي النهاية، أحب اقول انه عادي تكون فيه كليشيهات في روايتك الفانتازية، في عالمنا المعاصر صعب جدا تخلي عملك فريد من نوعه، لكن الكاتب الشاطر والمحترف بيسرق ويقتبس بمهارة، وحرفنة، الضغوظ علينا كتير عشان نتميز، لكن احنا مش مطالبين بده طول الوقت، في روايتي #بارهليون عملت إهداء لكل الكتاب الكبار الي استقيت منهم عناصر عالمي، الأرض المسطحة على شكل فيل، توكين ولافكرافت ومارتن وبورخس وكينج وباركر وجايمان وبولمان وأحمد خالد توفيق، المهم انك تسعى جاهدا لخلق علم مدهش وفريد ومختلف، وتخرج برا النطاق الي بيلعب فيه الكُتاب من أصحاب المناطق الآمنة..
أِشوفكم على خير في مقال قادم.
كتابات د. أحمد تركي 